Հարգելի՛ գործընկերներ,
Ջերմորեն շնորհավորում եմ մարտի 3–ի՝ Գործարարի օրվա կապակցությամբ։
Հայաստանի երրորդ հանրապետության շրջանում ձևավորված և կայացած գործարարությանը վիճակված է եղել ապրել բազմաթիվ բարդ շրջափուլեր, գործ ունենալ թե՛ քաղաքական, թե՛ տնտեսական տարատեսակ իրողությունների հետ, վերապրել անգամ ճգնաժամային իրավիճակներ։ Բայց որքան էլ ոչ դյուրին է եղել սեփական գործը ստեղծելն ու զարգացնելը, հայ ձեռներեցը դրսևորել է տոկունություն, համառություն, ստեղծարարություն, հավատ՝ ձևավորելով կայացած գործարար համայնք։
Այսօր էլ քիչ չեն տնտեսական գործունեությամբ զբաղվելուն խոչընդոտող գործոնները՝ աշխարհաքաղաքական վերադասավորումների գործընթաց ողջ աշխարհում, տարածաշրջանային անկայուն մթնոլորտ, արտաքին շուկաների ձևափոխումներ, ռազմական բախումներ, հաղորդակցության խնդիրներ, աշխատուժի և ֆինանսական հոսքերի աննախադեպ շարժ, տեխնոլոգիական վերազինման հրամայական։ Եվ, ի պատիվ հայ գործարարության, կարող ենք արձանագրել, որ նա արժանապատվորեն է դիմակայում առկա փորձություններին՝ ցուցաբերելով ճկունություն, նորարարական մոտեցումներ, նախաձեռնողականություն, մրցունակ արտադրանք ու ծառայություններ առաջարկելու և սպառման նոր հնարավորությունների որոնման կարողություն։ Արդյունքում՝ բացված հազարավոր աշխատատեղեր, տնտեսական ցուցանիշների աճ, իրականացված սոցիալական ու մարդասիրական բազում ծրագրեր։
Հատկանշական է նաև, որ այսօր մեզանում ձևավորվել է գործարարների երիտասարդ սերունդ, որը շարունակելով եղած ավանդույթները՝ նոր մտածողություն ու մշակույթ է ներմուծում տնտեսական կյանք։ Կուտակված փորձի ու նորարար մոտեցման համադրությամբ էլ կոչված ենք առաջ մղելու մեր գործունեությունը՝ ի նպաստ Հայաստանի վերափոխման, երկրի տնտեսության զարգացման, բարեկեցիկ ու անվտանգ կյանքի ապահովման։
Հարգելի գործարարներ, ևս մեկ անգամ շնորհավորելով մասնագիտական օրվա կապակցությամբ՝ մաղթում եմ խաղաղ երկինք և արդյունավետ աշխատանքային գործունեություն։