Համաշխարհայի Բանկ – ՀԱԳՄ գործակցություն
Փետրվարի 1-ին Համաշխարհային բանկի անկախ գնահատման խումբը այցելեց Հայաստանի արդյունաբերողների և գործարարների միություն: Այցը առնչվում էր Համաշխարհային բանկի խմբի կողմից առևտրի դյուրացման մասով տրամադրված աջակցության գլոբալ գնահատման շրջանակներում Հայաստանի օրինակի ուսումնասիրությունն իրականացնելու նպատակին: Գնահատվելու է 2016-2017 ֆինանսական տարիներին առևտրի դյուրացման համար իրականացված Համաշխարհային Բանկի խմբի ծրագրերի փաթեթը: Այս գնահատման շրջանակներում իրականացվում են մի շարք երկրների օրինակների ուսումնասիրություններ, և Հայաստանն ընդգրկվել է այդ երկրների շարքում:
Գնահատումը և Հայաստանի օրինակի ուսումնասիրությունը անդրադառնում է հետևյալ հարցին՝ որո՞նք են Հայաստանում առևտրի դյուրացման համար Համաշխարհային Բանկի խմբի տրամադրած աջակցության առանձնահատկությունները, և ինչքանո՞վ է այդ աջակցությունը նպաստել առևտրային հոսքերի բարեալվմանը՝ միջազգային առևտրի ծախսերի կրճատման միջոցով:
Խնդրի առնչությամբ Հայաստանում վերլուծության կենթարկվեն առևտրի դյուրացման մասով ՀԲԽ-ի կառույցների՝ Համաշխարհային բանկի և Միջազգային ֆինանսական կորպորացիայի միջամտությունները: Ուսումնասիրության շրջանակներում կգնահատվի քաղաքականության հարթությունում տարված երկխոսությունը, պետական և մասնավոր հատվածներին տրամադրված վարկերն ու տեխնիկական օժանդակությունը, միջամտությունների փոխլրացվածությունն ու հաջորդականությունը, ինչպես նաև այն ընդհանուր համատեքստը, որը նպաստել (կամ խանգարել է) ծրագրերի հաջողությանը:
Դրականորեն գնահատելով այցը՝ Հայաստանի արդյունաբերողների և գործարարների միության նախագահ Արսեն Ղազարյանը կարևորել է նման քայլերը և նշել, որ գործարարները ակնկալում են դրանց շարունակականությունը և առավել ուղղորդվածությունը:
