ԱԳՄԿ 25-ամյակին նվիրված Խորհրդի նիստ Մոսկվայում

Շուրջ քառորդ դար Արդյունաբերողների և գործարարների միջազգային կոնգրեսը արգասաբեր աշխատանք է կատարում Կոնգրեսին անդամակցող երկրների բիզնեսի աշխարհագրությունը ծավալելու և գործարար կապերը խորացնելու գործում։ Մասնավորապես Հայաստանի գործարար համայնքը մեծ բիզնեսում ներկայացնելու, նրա վարկանիշը բարձրացնելու, նոր շուկաներ գտնելու և հայ գործարարին համաշխարային բիզնեսին ինտեգրելու գործում Կոնգրեսը թե հայաստանյան և թե մյուս երկրներում կազմակերպած նիստերով ու հանդիպումներով մշտապես աջակցել է։

Փետրվարի 21-ին Հայաստանի արդյունաբերողների և գործարարների միության պատվիրակությունը, Մոսկվայում ՀԱԳՄ ներկայացուցիչ Արտաշես Շիրիկյանի գլխավորությամբ, մասնակցել է Արդյունաբերողների և գործարարների միջազգային կոնգրեսի 25-ամյա հոբելյանին նվիրված միջոցառմանը:

Հոբելյանական խորհրդի նիստին ներկա էին նաև Արդյունաբերողների և գործարարների միջազգային կոնգրեսի անդամ երկրների ազգային միավորումների ղեկավարներ և ներկայացուցիչներ:

Միջոցառման ընթացքում Արտաշես Շիրիկյանը Միջազգային կոնգրեսի Խորհրդին հանձնեց հոբելյանական հուշանվեր և ՀԱԳՄ նախագահ Արսեն Ղազարյանի շնորհավորական ուղերձը, որում արժևորվում է ԱԳՄԿ–ի և ՀԱԳՄ արգասաբեր գործակցությունը։

Միջազգային կոնգրեսի Խորհուրդը, 25-ամյա հոբելյանի կապակցությամբ, նշելով երկու կառույցների համատեղ աշխատանքում ՀԱԳՄ նախագահ Արսեն Ղազարյանի մեծ ներդրումը և Երևանյան նիստերի բացառիկ ջերմությունն ու անմոռաց հանդիպումները, նրան պարգևատրել է հոբելյանական հուշագրով։ Միաժամանակ ՀԱԳՄ անդամներին բազմամյա և համատեղ արդյունավետ աշխատանքի համար հանձնվել են շնորհակալագրեր։