Իր դռները բացեց Armenia EXPO 2023 տարածաշրջանային առևտրաարդյունա-
բերական ցուցահանդեսը

Երևանի Կարեն Դեմիրճյանի անվան մարզահամերգային համալիրում սեպտեմբերի 15-ին իր դռները բացեց Armenia EXPO 2023 22-րդ տարածաշրջանային առևտրաարդյունաբերական ցուցահանդեսը։ Վերջինիս իրենց մասնակցությունն են բերել 300 ընկերություններ Ռուսաստանից, Բելառուսից, Հայաստանից, Լեհաստանից, Վրաստանից, Արաբական Միացյալ Էմիրություններից, Ավստրիայից, Իրանից, Լատվիայից, Լիտվայից և Ղազախստանից։ Հայաստանի արդյունաբերողների և գործարարների միության ու «Լոգոս էքսպո կենտրոնի» համատեղ կազմակերպած ցուցահանդեսին ներկայացված են ամենատարբեր ոլորտներ՝ շինարարություն, բեռնափոխադրումներ, կահույքի արտադրություն, պոլիգրաֆիա և հրատարակչություն, սննդարդյունաբերություն, զբոսաշրջություն ու հանգիստ, ֆինանսական, տեղեկատվական տեխնոլոգիաներ։

Ողջունելով այս տարվա իր բնույթով ամենամեծ ցուցահանդեսի մասնակիցներին՝ Հայաստանի արդյունաբերողների և գործարարների միության փոխնախագահ Ներսես Կարամանուկյանը կարևորեց Armenia EXPO 2023-ի կազմակերպումը, որտեղ գործարարները հնարավորություն են ստանում հանդիպելու թե իրենց գործընկերներին, թե անմիջական սպառողներին, գործարար կապեր հաստատել արտասահմանյան ընկերությունների հետ։ Այն արտերկրի կազմակերպություններին հնարավորություն է տալիս գործունեություն ծավալել Հայաստանում, իսկ հայկական ընկերություններին՝ ընդլայնել իրենց արտահանման շուկաները։

ՀՀ Էկոնոմիկայի փոխնախարար Ռաֆայել Գևորգյանի գնահատմամբ՝ ցուցահանդեսի ներկայացչականությունը վկայում է վերջինիս կայացվածության մասին։ Նրա խոսքով՝ հարկ է համընթաց շարունակաբար զարգացնել նաև մասնագիտացված ցուցահանդեսների կազմակերպումը, ինչը կնպաստի մեր տնտեսություն մասնագիտական հմտությունների և նոր տեխնոլոգիաների ներգրավմանը, նոր գործարար կապերի ձևավորմանն ինչպես ԵԱՏՄ, այնպես էլ այլ տարածաշրջանային ու միջազգային մասնակիցների հետ։ Փոխնախարարը հավաստիացրեց, որ իրենց նախարարությունը շարունակական աջակցություն է ցուցաբերելու համանման նախաձեռնություններին։

Ըստ ՀՀ-ում ՌԴ առևտրային ներկայացուցչության ղեկավար Աննա Դոնչենկոյի՝ ներկա ցուցահանդեսը յուրահատուկ է նրանով, որ այն ունիվերսալ է և ընդգրկել է ամենատարբեր բնագավառներ։ Նրա ներկայացմամբ՝ Armenia EXPO 2023-ին մասնակցում են Ռուսատանի Դաշնության շուրջ մեկուկես տասնյակ տարածաշրջանների ներկայացուցիչներ։ «Շատ կարևոր է, որ ցուցահանդեսը լինի հարթակ ոչ միայն հանդիպումների ու ծանոթությունների, այլև գործարար կապերի հաստատման, հետաքրքիր նոր նախագծեր ի հայտ բերելու համար»,-նշեց Աննա Դոնչենկոն։

Armenia EXPO 2023 22-րդ տարածաշրջանային առևտրաարդյունաբերական ցուցահանդեսը կգործի մինչև սեպտեմբերի 17-ը։