Ներկայացվեց ՀՀ հակակոռուպցիոն ռազմավարության ու դրա իրականացման 2019-2022 թթ․ միջոցառումների 2022 թ․ տարեկան կատարման այլընտրանքային հասարակական մշտադիտարկման զեկույցը

«Առաջին հայացքից թվում է, թե գործարարությունն ու կոռուպցիայի դեմ պայքարը չհամընկնող են, բայց, եթե վերցնենք իրավաբանական լեզվով՝ որպես պայմանագրի կողմեր, մենք առաջին շահառուն ենք, որպեսզի Հայաստանում կոռուպցիայի մակարդակը լինի շատ ցածր, որ վարվող քաղաքականությունը և վերջինիս կիրառումն ունենան լուրջ արդյունքներ»,- ՀՀ հակակոռուպցիոն ռազմավարության ու դրա իրականացման 2019-2022 թվականների միջոցառումների 2022 թվականի տարեկան կատարման այլընտրանքային հասարակական մշտադիտարկման զեկույցի շնորհանդեսի բացման խոսքում նշեց Հայաստանի արդյունաբերողների և գործարարների միության նախագահ, Հակակոռուպցիոն քաղաքականության խորհրդի անդամ Արսեն Ղազարյանը։ Այդ առումով նա կարևորեց, որ ՀԱԳՄ-Ն և մի շարք հասարակական կազմակերպություններ հանդիսանում են Հակակոռուպցիոն քաղաքականության խորհրդի անդամ, որտեղ այդ քաղաքականության մշակումն անցնում է բավական թեժ մասնագիտական քննարկումներով։ «Շատ կարևոր է, որպեսզի հանրությունը և քաղհասարակությունը ռեալ մասնակցություն ունենան թե դրա մշակմանը, թե մշտադիտարկմանը, թե այլընտրանքային գնահատականին։ Վերջին հաշվով՝ այսօրվա մեր տնտեսական որոշակի հաջողությունների առաջնային հիմքը երկրում համակարգային կոռուպցիայի արմատական նվազումն է»,- ասաց Արսեն Ղազարյանը` փաստելով, որ համակարգային կոռուպցիայի ողնաշարը կոտրված է։

Նրա խոսքով՝ ներկայումս ունենք ավելի թափանցիկ, մրցակցային տնտեսություն, և ՀՆԱ-ի աճի տոկոսների մեջ ոչ միայն մեծ դեր են խաղում ներկրված աշխատուժն ու կապիտալը, այլև իրական տնտեսական աճը, որը գալիս է հավասար մրցակցության այսօր ավելի բարձր մակարդակից։ Ըստ Արսեն Ղազարյանի՝ եթե չլինի հավասարություն, օրինականություն, չինովնիկների կամայականությունների սահմանափակում, ապա հասարակությունը կդառնա տոտալիտար, բևեռացված։ «Այս իմաստով ենք մենք ակտիվ մասնակցում թե խորհրդի աշխատանքներին, թե այս հարթակի ձևավորմանը, որովհետև որպես գործարարություն իրական շահառու ենք»,-ասաց ՀԱԳՄ նախագահը։

ՀՀ արդարադատության նախարարի տեղակալ Կարեն Կարապետյանի խոսքով՝ կառավարության համար կոռոպցիայի դեմ պայքարը որպես գերակա ուղղություն սահմանված է և հետապնդվում է արդեն տարիներ շարունակ։ Այս գերակայությունն իր իրավական արտացոլումը գտել է ոչ միայն կառավարության ծրագրի մեջ, այլ նաև կոռուպցիայի դեմ պայքարի ռամավարության 2019-22 թթ, ինչպես նաև ներկայումս մշակվող 2023-26 թթ ժամանակահատվածի համար գործողությունների պլաններում։ «Սահմանված նպատակներին հասնելու համար իր ուրույն և կարորորագույն դերն ունի պետության և հասարակական հատվածի հետ համագործակցությունը։ Այս ենթատեքստում հատուկ կարևորություն է տրվում նշված գործողությունների պլանի այլընտրանքային մշտադիտարկմանը և զեկույցների պատրաստմանը, որը մեր գործընկերները շատ արդյունավեր իրականացնում են»,-նշեց փոխնախարարը։

Իրավունքի Եվրոպա միավորման նախագահ Լուսինե Հակոբյանը ներկայացրեց, որ իր ղեկավարած ՀԿ-ն տարիներ շարունակ մշտադիտարկել է հակակոռուպցիոն ոլորտի բարեփախումները, մասնավորապես կենտրոնանալով պետական կառավարման ու դատական համակարգերում պաշտոնների զբաղեցման վրա՝ ջատագովելով այդ գործընթացում մրցութային ու թափանցիկ ընթացակարգը, ինչը թույլ կտա բացառել հովանավորչությունը և այլ կոռուպցիոն դրսևորումները։ «Հակակոռոպցիուն պայքարը ոչ միայն կաշառքի դեմ պայքարն է, հակակոռուպցիոն կրթությունը և այլն, այլև հենց այսպիսի օղակներում կոնկրետ պաշտոնների թափանցիկ ու մրցութային կարգով զբաղեցման հանրային վերահսկողությունը։ Ուրախ եմ, որ մենք այս փուլում ակտիվորեն ներգրավված ենք հակակոռուպցիոն ռազմավարության մշակման գործին, և մեծ հույսեր եմ տածում, որ սա ուղղակի չի լինի հերթական հակակոռուպցիոն ռազմավարությունը, որպիսին մենք ունեցել ենք 2000-ականներից սկսած, այլ իրականում մեզ կհաջողվի դրանում արձանագրել բոլոր գործողությունները և ըստ էության կատարել ու հասցնել ավարտին»,-նշեց բանախոսը։

Շնորհանդեսի շրջանակներում Հայաստանի արդյունաբերողների և գործարարների միությունը, Իրավաբանների հայկական ասոցիացիան և Իրավունքի Եվրոպա միավորումը ստորագրեցին Հակակոռուպցիոն 5-րդ ռազմավարության մշակման, դրա իրազեկման և մշտադիտարկման նպատակով հավաքական ջանքերի համախմբման վերաբերյալ համաձայնագիր։

«Հավատում եմ, որ այս կոալիցիոն հարթակով կկարողանանք մեր մշտական այլընտրանքային դիտարկումն իրականացնել, բացահայտել կոռուպցիայի դեմ կատարվող գործողությունների թերություններն ու ձգտել ավելի կատարյալ արդյունքների»,-նշեց ՀԱԳՄ նախագահ Արսեն Ղազարյանը։

Ըստ Իրավաբանների հայկական ասոցիացիայի նախագահ, Հակակոռուպցիոն քաղաքականության խորհրդի անդամ Կարեն Զադոյանի՝ Համաձայնագրի մեջ շատ կարևոր դրույթներ կան, որով ստորագրող կողմերն աջակցելու են ոլորտային քաղաքականություն մշակող մարմնին՝ ՀՀ արդարադատության նախարարությանը, ցուցաբերվելու է փորձագիտական աջակցություն։ Նրա հոսքով՝ գործունեությունը ծավալվելու է կառուցողական երկխոսության հիմունքներով, տրվելու են գնահատականներ, իրականացվելու է արդյունքների մշտադիտարկում՝ նպատակ հետապնդելով, որպեսզի քաղաքականության մշակումը, գնահատումը, իրազեկումը, ավելի արդյունավետ բնույթ կրեն։
Իր խոսքում հակակոռուպցիոն կոալիցիայի ստեղծման նախաձեռնությունը ողջունելի որակեց Արևելյան գործընկերության քաղաքացիական հասարակության ֆորումի Հայաստանի ազգային պլատֆորմի համակարգող Հովսեփ Խուրշուդյանը, հույս հայտնելով, որ այն կոռուպցիայի հաղթահարման առումով էապես օգնելու է
մեծ խնդիրների առջև կանգնած Հայաստանին։ «Հաճախ քաղհասարակության ձայնը լսելի չի լինում, և հույս ունեմ, որ կոալիցիայի ստեղծումով այն ավելի լսելի կդառնա»,-նշեց նա։

ՀՀ հակակոռուպցիոն ռազմավարության և դրա իրականացման 2019-2022 թթ․ միջոցառումների 2022 թ․ տարեկան կատարման այլընտրանքային հասարակական մշտադիտարկման զեկույցի արդյունքների և առաջարկությունների հակակոռուպցիոն ինստիտուցիոնալ համակարգի ու հակակոռուպցիոն կրթության հատվածները ներկայացրեց Հայաստանի ՔՀԿ-ների հակակոռուպցիոն կոալիցիայի հակակոռուպցիոն փորձագետ Սյուզաննա Սողոմոնյանը։

Կոռուպցիայի կանխարգելման և կոռուպցիայի հակազդմանն հատվածները համապատասխանաբար ներկայացրեցին Հայաստանի ՔՀԿ-ների հակակոռուպցիոն կոալիցիայի հակակոռուպցիոն փորձագետներ Մարիամ Զադոյանը և Առնոլդ Վարդանյանը։