Համագործակցության համաձայնագիր ստորագրվեց ՀԱԳՄ-ի և Թաթարստանի արդյունաբերական կլաստերի միջև

Հայաստանի արդյունաբերողների և գործարարների միությունում մարտի 9-ին հյուրընկալվեց ՌԴ Թաթարստանի Հանրապետության արդյունաբերական կլաստերի պատվիրակությունը՝ վարչության նախագահ Սերգեյ Մայորովի գլխավորությամբ։ Կառույցն ամենախոշորն է Ռուսաստանի 48 համանման կլաստերների մեջ՝ իր 300-ից ավելի ընկերություններով, 25 երկրներ ներկայացնող 500-ից ավելի կազմակերպությունների հետ համագործակցության համաձայնագրերով։ 

Կլաստերի վարչության նախագահը ներկայացրեց ինչպես Թաթարստանի տնտեսական կարողությունները, այնպես էլ իրենց կառույցի գործունեության ուղղությունները։ Հանրապետությունում գործում է 107 տեխնոպարկ, 2 հատուկ տնտեսական գոտի, առաջատար դիրքերից է գրավում ՌԴ նավթարդյունաբերության, մեքենաշինության, սինթետիկ կաուչուկի, պոլիէթիլենային արտադրության, շինարարության, տեղեկատվական տեխնոլոգիաների և այլ ոլորտներում։ Սերգեյ Մայորովի խոսքով՝ իրենց այցի նպատակն է ուսումնասիրել Հայաստանում ներդրումային ծրագրերի իրականացման, համատեղ ձեռնարկությունների ստեղծման, տնտեսական գործակցության խորացման հնարավորությունները։ Այդ նպատակով ապրիլին նախատեսված է  Թաթարստանի Հանրապետության ղեկավար Ռուստամ Մինիխանովի այցը Հայաստան, որին կուղեկցի գործարարների պատվիրակություն։

Սերգեյ Մայորովը ՀԱԳՄ անդամներին հրավիրեց մասնակցելու մայիսի 18-20-ը Կազանում կայանալիք տնտեսական համաժողովին։

Ներկայացնելով Հայաստանի արդյունաբերողների և գործարարների միության գործունեության ուղղությունները՝ ՀԱԳՄ նախագահի տեղակալ Արմեն Մարտիրոսյանն անդրադարձավ նաև տարբեր երկրների հետ Միության կողմից իրականացվող համագործակցությանը, երկկողմ համատեղ ծրագրերի հնարավոր ուղղություններին։ 

Հայաստանի արդյունաբերողների և գործարարների միության ու ՌԴ Թաթարստանի Հանրապետության արդյունաբերական կլաստերի միջև ստորագրվեց Համագործակցության համաձայնագիր, որով կողմերը մասնավորապես պայմանավորվում են իրականացնել առևտրային, տեխնիկական և համապատասխան տեղեկությունների պարբերական փոխանակում, կազմակերպել համատեղ միջոցառումներ, իրականացնել խորհրդատվական և աջակցության ծառայություններ։