Աշխատանքային հարաբերությունները կարգավորող իրավական դրույթները պարզաբանող ձեռնարկ

Աշխատանքային իրավունքների պաշտպանության ոլորտում պետությունն ունի կարևոր դերակատարություն, հատկապես աշխատանքային հարաբերությունների նորմատիվ կարգավորման և աշխատանքային իրավունքների պաշտպանության մեխանիզմների ապահովման հարցում։ Այդ մեխանիզմներից մեկն էլ ստուգաթերթերն են, որոնց միջոցով ոլորտի նկատմամբ վերահսկողություն իրականացնող պետական մարմիններն իրավունք են ձեռք բերում դրանցում նշված հստակ հարցերի շրջանակներում իրականացնել աշխատանքային իրավունքի նորմերի պահպանումը։

Աշխատանքային իրավունքի բնագավառում ստուգումներ իրականացնելու ստուգաթերթը հաստատվել է ՀՀ կառավարության 2022 թվականի մարտի 10-ի N 299-Ն որոշմամբ։ Ի՞նչ են պարտադրում և հուշում աշխատանքային իրավունքի խնդիրները վերհանող ստուգաթերթի հարցերը։ Այս հարցադրման ամբողջական բացահայտմանն է միտված Հայաստանի արդյունաբերողների և գործարարների միության ու ՀՀ առողջապահական և աշխատանքի տեսչական մարմնի համագործակցությամբ հրապարակված «Աշխատանքային իրավունք» ձեռնարկը։

Վերջինս նպատակ է հետապնդում աջակցել գործատուներին կանխարգելելու կազմակերպությունում աշխատանքային իրավունքների առերևույթ խախտումները՝ հետագայում վարչական պատասխանատվությունից խուսափելու համար։ Ձեռնարկը գործատուին հնարավորություն է ընձեռնում անմիջականորեն ծանոթանալ աշխատանքային հարաբերությունները կարգավորող իրավական դրույթներին և աշխատողների հետ իր համագործակցությունը ի սկզբանե ձևավորել ՀՀ օրենսդրությանը համապատասխան։

Ձեռնարկը հեղինակել են Հովսեփ Պողոսյանն ու Իգիթ Հակոբյանը՝ Ալվարդ Արշակյանի, Տաթև Համբարձումյանի և Վերա Ավետիսյանի մասնակցությամբ։ Այն Հայաստանի արդյունաբերողների և գործարարների միության ու ՀՀ առողջապահական և աշխատանքի տեսչական մարմնի համագործակցությամբ հրապարակված երկրորդն է՝ «Կարմիր գծեր, որոնք չպետք է հատեն գործատուները» գրքույկից հետո։ Վերջինում անդրադարձ է կատարվել ՀՀ աշխատանքային օրենսդրության նկատմամբ Առողջապահական և աշխատանքի տեսչական մարմնի կողմից լիարժեք վերահսկողություն իրականացնելու օրենսդրական դրույթներին։