Հայաստանի արդյունաբերողների և գործարարների միության նախագահ Արսեն Ղազարյանի ամանորյա ուղերձը

Հարգելի՛ գործարարներ, հայրենակիցներ,

Ամեն տարեմուտ առիթ է հետ նայելու, արժևորելու նախորդ տարին, վերլուծելու արածը, կշռելու չարածն ու դրանց հետևանքները։ 2022-ը ևս հեշտերից չէր․ դարձյալ ունեցանք թշնամական ագրեսիա, անմեղ զոհեր, կորուստներ, աշխարհաքաղաքական լարվածություն, շրջափակում, տնտեսական ու սոցիալական խնդիրներ։ Բայց, ի հեճուկս ամեն ինչի, չկորցրինք մեր տոկունությունը, նետված մարտահրավերները հաղթահարելու վճռականությունը, վաղվա օրվան լավատեսորեն նայելու կարողությունը։

Հայ գործարարությունն էլ իր վրա անմիջականորեն զգաց եղած անբարենպաստ հանգամանքների ազդեցությունը, բախվեց երբեմն անլուծելի թվացող հիմնահարցերի, սակայն իրեն հատուկ համբերությամբ, համառությամբ, ստեղծարարությամբ ու հետևողական աշխատանքով կարողացավ պահպանել տնտեսական կայունությունը, գործերի շարունակականությունը, ստեղծել աշխատատեղեր, աջակցել երկրի ու հանրության առջև ծառացած անվտանգային ու սոցիալական խնդիրների լուծմանը։

Այս առումով գնահատանքի ու հարգանքի են արժանի ինչպես մեր գործարար համայնքը, այնպես էլ բոլոր այն գործավորները, որոնք իրենց արհեստավարժ աշխատանքով իրողություն են դարձրել տնտեսական ամենատարբեր ծրագրերն ու  նախաձեռնությունները։ Հենց ջանքերի համատեղմամբ, միասնականությամբ, նպատակամետ գործերով կկարողանանք հաղթահարել մեզ բաժին հասած մարտահրավերները, ունենալ անվտանգ ու հզոր հայրենիք։

Շնորհավորելով բոլոր գործարարների, աշխատավորության, նրանց ընտանիքների  Նոր տարին՝ ցանկանում եմ խաղաղություն, արգասաբեր գործունեություն, բարեկեցություն ու երջանկություն։ Թո՛ղ որ 2023 թվականը հագեցած լինի հաջողություններով, Հույսով, Հավատով և Սիրով։

Շնորհավո՛ր Ամանոր և Սուրբ Ծնունդ։