Հանդիպում ՀԱԳՄ-ում

Դեկտեմբերի 6-ին ՀՀ վարչապետի աշխատակազմի «Տեղեկատվական և վերլուծական կենտրոն» ՊՈՒԱԿ-ի պատասխանատու աշխատակիցներ Հովհաննես Մովսիսյանը և Գոռ Ծառուկյանը հանդիպում ունեցան Հայաստանի արդյունաբերողների և գործարարների միության ղեկավարության հետ։

Կենտրոնի տնօրեն Հովհաննես Մովսիսյանը, մինչ բուն խնդրո առարկային անցնելը, համառոտ տեղեկություն տվեց ԱՄՆ՝ մասնավորապես Լոս Անջելես կատարած այցի և գլենդելաբնակ մեր հայրենակիցների հետ հանդիպումից։ Պարոն Մովսիսյանին տեղեկացրել են, որ 20-28 տարեկան մի խումբ հայ երիտասարդներ ցանկություն են հայտնել տեղափոխվելու Հայաստան բիզնես ծրագրեր իրականացնելու։ Պարոն Հովհաննես Մովսիսյանը Միության ղեկավարությանը առաջարկեց ըստ ամենայնի զորակցելու այդ երիտասարդներին տեղավորման, նրանց օրենսդրությանը ու Հայաստանի բիզնես մթնոլորտին ծանոթացնելու, արտադրություններ այցելելու, հանդիպումներ ու բիզնես տուրեր կազմակերպելու և այլ հարցերում։ Հայաստանի արդյունաբերողների և գործարարների միության նախագահ Արսեն Ղազարյանը գոհունակությամբ պատրաստակամություն հայտնեց հնարավորինս բոլոր հարցերում աջակցելու և երիտասարդ գործարարներին սերտորեն կապելու Միության հետ։

Պարոն Հովհաննես Մովսիսյանը տեղեկացրեց, որ նախատեսված է առաջիկայում ստեղծել «Մեր ժամանակների հերոսը» հիմնադրամ, որը զորակցելու է նոր բիզնես ծրագրերի՝ անկախ տարիքից և այլ հանգամանքներից։ Նա նշեց հեռուստատեսային հաղորդաշարի օրինակը որպես ծրագրի ներկայացման, հանրայնացման ու ծավալման տարբերակ։ Հիմնադրամը պետք է ծրագրեր հովանավորի, նպաստի մեր օրերում գործարարի բարոյական կերպարի ձևավորմանը, օգնի հաղթահարելու կարծրատիպերը։

Քննարկվեցին ու պարզաբանվեցին առանձին խնդիրներ, որոնք վերաբերում են հիմնադրամի բարերարներին գովազդային բլոկներում ներգրավելու, շահութահարկի և ավելացված արժեքի հարկի գանձման ժամանակ արտոնություններ տրամադրելու և այլ հարցեր։

ՀԱԳՄ նախագահ Արսեն Ղազարյանը հավաստիացրեց, որ հիմնադրամին գործարարները ֆինանսականից բացի աջակցելու են նաև իրենց փորձով, գիտելիքներով ու գաղափարներով։ Հանդիպումն անցավ հաճելի փոխըմբռնումով։

Հայաստանի արդյունաբերողների և
գործարարների միություն