Հայաստան-Շվեյցարիա գործարար համաժողով

Ապրիլի 12-ին Շվեյցարիայի Համադաշնության Ժնև քաղաքում կայացել է “Հայաստան. բացահայտեք գործարար հնարավորությունները” խորհագրով գործարար համաժողովը: Այն կազմակերպվել էր Ժնև կանտոնի Առևտրաարդյունաբերական պալատի, ՀՀ Տնտեսական զարգացման և ներդրումների նախարարության և Հայաստանի արդյունաբերողների և գործարարների միության համագործակցությամբ` Շվեյցարիայում Հայաստանի առևտրային ներկայացուցչի նախաձեռնությամբ ու համակարգմամբ:

Միջոցառմանը բացման խոսքով հանդես եկան ԺԱԱՊ գլխավոր տնօրենի տեղակալ Վինսենթ Սուբիլիան, ՀԱԳՄ նախագահ Արսեն Ղազարյանը, ԱՀԿ-ում ՀՀ մշտական ներկայացուցիչ Տիգրան Դավթյանը: Պարոն Սուբիլիան խիստ դրական գնահատեց Հայաստանի նկատմամբ շվեյցարական գործարար համայնքի հետաքրքրությունը և ձեռնամուխ է լինելու դեպոի Հայաստան գործարար պատվիրակության այցի կազմակերպմանը:

Համաժողովի ընթացքում Շվեյցարիայում ՀՀ առևտրական ներկայացուցիչ Հայկ Հովհաննիսյանը շվեյցարացի, ֆրանսացի և այլ օտարերկրյա գործարարներին է ներկայացրել Հայաստանի ներդրումային դաշտը և գործարար միջավայրը: Միջոցառման ընթացքում ներկայացվել են նաև Հայաստանի ՏՏ, զբոսաշրջության, ազատ տնտեսական գոտիների, ֆինանսաբանկային համակարգի, վերականգնվող էներգետիկայի, ոսկերչության և գինեգործության ոլորտների առանձնահատկություններն ու գրավչությունը:

Հայաստանյան գործարար պատվիրակության կազմում ընդրկվել են բեռնափոխադրումների, ֆինանսաբանկային, ՏՏ, ազատ տնտեսական գոտիների, առողջապահության, հանքարդյունաբերության, զբոսաշրջության, էներգետիկայի, սննդարդյունաբերության և խորհրդատվական շուրջ 30 ընկերությունների ղեկավարներ և ներկայացուցիչներ:

Որպես Հայաստանի և Շվեյցարիայի տնտեսական համագործակցության ընդլայնման և խորացման երաշխիք, հայ – շվեյցարական գործարար համաժողովին Հայաստանի արդյունաբերողների և գործարարների միության և Ժնև Կանտոնի առևտրաարդյունաբերական պալատի միջև կնքվել է համագործակցության հուշագիր: Սա նոր մակարդակի կբարձրացնի ֆրանսախոս Շվեյցարիայի և հայկական գործարար շրջանակների համագործակցության հնարավորությունները:

Միջոցառման ավարտին կազմակերպվել է հայկական արտադրանքի ցուցադրություն-համտես: Նույն օրը, համաժողովին նախորդել է հայկական արտադրանքի ցուցադրություն և անհատական /B2B ձևաչափով/ հանդիպումներ՝ շվեյցարական գործարարների հետ: Ձեռք են բերվել հետագա համագործակցության վերաբերյալ նախնական պայմանավորվածություններ Հայաստանյան ներգնա տուրիզմի, ալկոհոլի արտահանման, քարի արտահանման ու լոգիստիկայի, ազատ գոտիների մասով:

Հայաստանի նկատմամբ մեծ հետաքրքրությունն արտահայտվեց միջոցառումների բազմամարդ սրահներում, ուր ներկա էին շվեյցարիայից և ֆրանսիայից ժամանած շուրջ 70 գործարարներ` թե՛ օտարազգի, թե՛ հայ: Ներկա էին շվեյցարական ԶԼՄ ներկայացուցիչներ, որոնք նյութեր են նախապատրաստում միջոցառման լուսաբանման համար:

Ուրբաթ, ապրիլի 13-ին պատվիրակությունը մասնակցելու է նաև Ժնևում Հայոց Ցեղասպանությանը նվիրված հուշահամալիրի բացման արարողությանը: