Հայ–չեխական գործարար համաժողով

Փետրվարի 11–ին Երևանում կայացավ «Հայ–չեխական» գործարար համաժողով, որի համակազմակերպիչներից էր Հայաստանի արդյունաբերողների և գործարարների միությունը։

«Հայաստանը կողջունի չեխական կապիտալի ընդլայնումը իր տնտեսությունում», – գործարար համաժողովի բացման ժամանակ հայտարարեց ՀՀ էկոնոմիկայի նախարար Կարեն Ճշմարիտյանը: Նա շեշտեց, որ վստահելի գործընկերային հարաբերություններ հաստատելու առումով Հայաստանը հեռանկարային գործընկեր կարող է լինել Չեխիայի համար: «Մեր երկկողմ տնտեսական հարաբերությունները զարգացման ներուժ ունեն: Կարող եմ վստահորեն ասել, որ Հայաստանում ձևավորվել է բարենպաստ ներդրումային ու գործարար միջավայր»։

Նախարարը չեխ գործարարներին տեղեկացրեց, որ Հայաստանն ազատ առևտրի համաձայնագրեր ունի ԱՊՀ գրեթե բոլոր երկրների հետ, նախորդ տարվանից անդամակցում է Եվրասիական տնտեսական միությանը, ինչպես նաև օգտվում է Եվրամիության GSP+ արտոնյալ ռեժիմից: «Հայաստանի ինտեգրումը ԵԱՏՄ-ին նոր հեռանկարներ կարող է բացել օտարեկրյա ներդրողների համար, որոնք Հայաստանի տնտեսական տարածքով կարող են ավելի դյուրացված կարգով դուրս գալ վերոնշյալ շուկա», - ավելացրեց Ճշմարիտյանը:

Նա առաջարկեց խոշոր չեխական ընկերություններին դիտարկել Հայաստանում գլխամասային կենտրոններ հիմնելու հնարավորությունները:

Հայաստանի արդյունաբերողների և գործարարների միության փոխնախագահ Հայկազ Բախշեցյանի տեղեկացմամբ՝ Միությունը զգալի աշխատանք է կատարել հայ–չեխական գործարար կապերի զարգացման գործում և ժամանակն է նաև գործի դնել չօգտագործված հնարավորություններն ու միջոցները։

Չեխ գործարարները ներկայացնում են բանկային ու ներդրումային, վերգետնյա ռազմական տրանսպորտային միջոցների, արտահանման ապահովագրության, ցողունային բջիջների հետազոտության, բիզնես խորհրդատվության, էլեկտրաէներգիայի, քաղցրավենիքի արտադրության, երկաթուղային և օդային բեռնափոխադրումների կազմակերպություններ: