Հանդիպում Ադանայի գործարար համայնքի ներկայացուցիչների հետ

Ս.թ. փետրվարի 20-ին Թուրքիայի Ադանա քաղաքում Հայաստանի արդյունաբերողների և գործարարների միության (ՀԱԳՄ) արտաքին կապերի գծով մասնագետ Արմեն Մելքոնյանը հյուրընկալվեց տեղի արդյունաբերողների պալատի խորհրդի նախագահ Զեքի Քվանչի կողմից:

Հանդիպման ժամանակ Արմեն Մելքոնյանը ներկայացրեց Հայաստանի և Թուրքիայի միջև տնտեսական հարաբերությունների բարելավման ուղղությամբ միության կողմից տարվող աշխատանքները, Հայաստանի և Թուրքիայի միջև գործարար համագործակցության ներկա իրավիճակը, առկա մարտահրավերներն ու խոչընդոտները՝ ընդգծելով, որ երկու հարևան երկրների միջև տնտեսական հարաբերությունները կարգավորող որևէ իրավական փաստաթղթի բացակայության պայմաններում միակ բանը, որը կարգավորում է երկու երկրների գործարար հարաբերությունները, բիզնես էթիկայի կանոններն են, քանի որ պաշտոնապես Թուրքիայից հնարավոր չէ ապրանք ներմուծել Հայաստան փակ սահմանների պատճառով:

Իր հերթին Զեքի Քվանչն ընդգծեց, որ գործընկերային հարաբերություններ հաստատելու, ինչպես նաև հասարակական կարծիք ձևավորելու առումով շատ էական են նմանատիպ այցելությունները:

Շնորհակալություն հայտնելով ջերմ ընդունելության համար՝ ՀԱԳՄ ներկայացուցիչը նշեց, որ Հայաստան վերադառնալով՝ միության նախագահին կներկայացնի հանդիպման ընթացքում ձեռք բերված որոշակի առաջարկությունների մասին:

Նույն օրը ՀԱԳ Միության ներկայացուցչին հյուրընկալել է նաև Ադանայի առևտրի պալատի խորհրդի նախագահ Աթիլա Մենևշեն: Խոսելով Ադանայի և Երևանի միջև փոխշահավետ գործընկերային կապերի հաստատման և համագործակցային դաշտի ստեղծման մասին՝ կողմերն իրենց ուշադրությունը սևեռել են հիմնականում զբոսաշրջության զարգացման նախադրյալների վրա: «Միջպետական հարաբերությունների բացակայության պայմաններում երկու երկրները միմյանց կամրջելու բեռն ընկնում է հասարակական կամ ժողովրդական դիվանագիտության ուսերին: Երկու ժողովուրդների միջտնտեսական և միջմշակութային հարաբերությունների կարգավորման տեսանկյունից էական է Հայաստանում և Թուրքիայում զբոսաշրջության զարգացումը խթանող համատեղ ծրագրերի մշակումն ու իրականացումը: Այս առումով հայաստանյան մի շարք քաղաքներ և Ադանան ու շրջակա նահանգները՝ ի դեմս Մերսինի և Հաթայի, կարող են դիտարկվել որպես առողջարանային, մշակութային, ինչպես նաև սպորտային տուրիզմի զարգացման համար բարենպաստ վայրեր»,- նշեց Արմեն Մելքոնյանը: