Գործարար հանրությունը «վախ ունի» Մաքսային միության հետ կապված

«Ազատության» հետ զրույցում Հայաստանի արդյունաբերողների և գործարարների միության նախագահ Արսեն Ղազարյանը փոխանցեց, թե երկրի գործարար հանրության շրջանում վախ կա ՄՄ-ի հետ կապված:

«Մենք գնում ենք շատ ճիշտ համակարգի, [բայց] մարդիկ այդ համակարգից վախենում են: Մենք 4-5 տարի շարունակ միակողմանիորեն խոսել ենք, քարոզել ենք Եվրոպայի հետ Ասոցացման համաձայնագրի առավելությունների մասին: Երբ խոսք էր գնում Մաքսային միության մասին, կա՛մ լռում էինք , կա՛մ վատաբանում: Այսօր գնում ենք, մարդիկ վախ ունեն․ ո՞րն է սրա դրականը: Եվ ինչքան էլ փորձես քարոզել, հասարակական գիտակցությունը, մտածողությունն այդքան արագ չի փոխվում: Պետական քարոզչությունն էլ այստեղ խնդիր ուներ և չարեց, և այսօր ունի, որ պետք է անի»:

Ղազարյանի փոխանցմամբ, Հայաստանի տնտեսության, գործարար հանրության համար անչափ կարևոր են այն բացառությունները, որոնց շուրջ Հայաստանի կառավարությունը պետք է բանակցի Մաքսային միության հետ:

Այս պահի դրությամբ մոտ 850 անուն ապրանքների շուրջ Հայաստանը մտադիր է բացառություն ստանալ Մաքսային միությունից, որպեսզի այդ ապրանքների գծով մաքսատուրքերը չբարձրանան, երբ Հայաստանը դառնա միության անդամ:

«Բանակցությունները պիտի սկսվեն արդեն մարտի 1-ից կամ 10-ից և մեկ ամսվա ընթացքում ավարտվեն: Եվ շատ կարևոր է, թե այդ բանակցությունների ընթացքում մենք որքանով կարող ենք փաստարկել մեր իրական պահանջմունքը, իսկ դա թվեր են՝ ի՞նչ ներկրում ես ունեցել, տնտեսական էֆեկտը ո՞րն է, սպառողական շուկան ինչպե՞ս է արձագանքում դրան: Եվ 850-ը փորձել ստանալ: Եթե 850-ն էլ լինի, կլինի ռեկորդ: Կարող է լինի մաքսիմում 600 կամ 500 ապրանքատեսակ․․․ Ես չգիտեմ խոհանոցը, բայց գիտեմ՝ եթե բանակցային գործընթաց է, դու էլ պետք է զիջումների գնաս»:

Արսեն Ղազարյանը ևս մեկ ուշագրավ հայտարարություն արեց՝ թե չի կարծում, որ Հայաստանի ղեկավարությունը գնա Մաքսային միություն, եթե այդ բացառությունները չարվեն մեր երկրի համար․ - «Գերխնդիրը մաքսիմումին հասնելն է: Իսկ եթե տեսականորեն ընդունենք ձախողում, ես չեմ կարծում, [որ] մեր քաղաքական ղեկավարությունը գնա այդ քայլին: Չի կարող բանակցությունները հաջողությամբ չընթանան, և մենք գնանք ու ստորագրենք: Դա աբսուրդ կլինի»:

«Ցանկացած փոփոխություն հեշտ չի տրվում», - շարունակեց Հայաստանի արդյունաբերողների և գործարարների միության նախագահը: - «Ասել, որ մենք շատ սահուն և միակողմանի միայն դրական պտուղներ ենք քաղելու, կլինի միամիտ մեկնաբանություն: Ռազմավարությունն ինքը ճիշտ է: Մեր տնտեսության ինտեգրացիան, ճյուղային զարգացածությունը՝ հատկապես տեղական արդյունաբերության արտահանող ոլորտների, ուղղված է դեպի ԱՊՀ տարածք: 90 տոկոս մեր վերամշակող արտադրությունը, մեր հանրահայտ խմիչքները, ջրեղենը, պահածոները, վերամշակված գյուղմթերքը, որը գնալով աճելու է, արտահանվում և իրացվում է Ռուսաստանի Դաշնության շուկայում և ԱՊՀ տարածքում»:

Ազգային վիճակագրական ծառայության հրապարակած տեղեկության համաձայն, Հայաստանում կրճատվել է ռազմավարական նշանակության ապրանքների սպառումը: 2013-ին, 2012-ի համեմատ, նվազել են հացի, ձվի, հավի մսի, շաքարավազի, կարագի, էլեկտրաէներգիայի, բենզինի և այլ կարևոր կամ ռազմավարական նշանակության ապրանքների սպառման ծավալները:

Հարցին, թե գործարար հանրությունն ինչպե՞ս է արձագանքել այս տեղեկությանը, Ղազարյանն արձագանքեց․ - «Մտահոգված են և չեն համակերպվում: Որովհետև հնարավոր չէ, որ ամեն մեկս մեր դղյակի մեջ փորձենք հաջողություններ ունենալ․ տնտեսությունը միասնական մարմին է: Այսօր նույնիսկ որակյալ աշխատուժի արտագաղթը ռեալ կադրային հարց է բարձրացնում կազմակերպություններում․․․ Եթե այսպես շարունակվի ևս մի քանի տարի, մենք ուղղակի ՀՆԱ-ի այն աճը, որ ունենք, դա էլ չենք ունենա, ավելի քիչ սպառող կունենանք, և կլինի շատ վատ: Բայց հնարավոր է դեռ կանգնեցնել սա և աճ ապահովել»:

Սարգիս Հարությունյան

Աղբյուրը՝ azatutyun.am