Տեղի ունեցավ «Հայ-չեխական գործարար համաժողով»

Հունվարի 31-ին Պրահայում ՀՀ Նախագահ Սերժ Սարգսյանի' Չեխիայի Հանրապետություն կատարած այցի շրջանակներում տեղի ունեցավ «Հայ-չեխական գործարար համաժողով»: Գործարար համաժողովի կազմակերպիչներն են Հայաստանի արդյունաբերողների և գործարարների միությունը և Զարգացման հայկական գործակալությունը:

Հայկական պատվիրակության կազմում ընդգրկված էին արդյունաբերության տարբեր ոլորտներ, ինչպիսիք օրինակ' շինարարությունը, փոքր ՀԷԿ-եր, գյուղատնտեսությունը, դեղագործությունը, զբոսաշրջությունը ներկայացնող մոտ 30 գործարարներ: Չեխական կողմը ներկայացնում էին 100-ից ավելի գործարարներ, որոնք մեծ հետաքրքրություն են ցուցաբերել Հայաստանի հետ համագործակցության շուրջ: Հայաստանի և Չեխիայի շինարարների միությունների միջև կնքվում է համագործակցության համաձայնագիր:

Բացման խոսքով հանդես եկան Չեխիայի Հանրապետության նախագահ պարոն Միլոշ Զեման և ՀՀ նախագահ Սերժ Սարգսյանը: Համաժողովին ելույթներով հանդես եկան նաև Չեխիայի Հանրապետության արդյունաբերության և առևտրի նախարարն ու ՀՀ էկոնոմիկայի նախարարը: Երկու երկրների միջև ապագա համագործակցության հեռանկարների մասին խոսեց Չեխիայի Արդյունաբերողների միության նախագահ պարոն Յարոսլավ Հանակը: Հայաստանի ներդրումային միջավայրի վերաբերյալ շնորհանդես ներկայացրեց Զարգացման հայկական գործակալության գլխավոր տնօրեն Ռոբերտ Հարությունյանը:

Նախատեսվում է Չեխիայի Հանրապետության նախագահի պատասխան այցը Հայաստան' ուղեկցությամբ Չեխիայի առաջատար գործարարների: