Սևծովյան տնտեսական համագործակցությունը կամուրջ կստեղծի ԵՄ-ի և ՄՄ-ի միջև

Սեւծովյան տնտեսական համագործակցության խորհուրդը ինտեգրացիոն կամուրջ է դառնալու երկու խոշոր տնտեսական միավորների' Եվրամիության եւ Եվրասիական միության միջեւ։ Այս մասին Սեւծովյան տնտեսական համագործակցության գործարար խորհրդի վարչության 47-րդ նիստի ավարտին լրագրողների հետ զրույցում նշեց Հայաստանի արդյունաբերողների եւ գործարարների միության նախագահ Արսեն Ղազարյանը: Նա հիշեցրեց, որ Սևծովյան համագործակցության երկրների մի մասը Եվրամիության, մյուս մասը' Մաքսային միության անդամ են, հետևաբար, այս կառույցը կամուրջ է լինելու երկու խոշոր միավորների միջև։ «Մաքսային միությանն անդամակցելու պարագայում մենք չենք խզում կապերը եվրոպական շուկայի հետ: Մենք շարունակելու ենք խրախուսել եվրոպական ներդրումները Հայաստանում, և համոզված եմ, որ մի քանի տարի անց մենք ավելի շատ եվրոպական ներդրողներ կունենանք մեր երկրում», - «Արմենպրես»-ի հաղորդմամբ՝ ասաց Ղազարյանը։
Արսեն Ղազարյանը նաև տեղեկացրեց, որ փոխվելու է ՍԾՏՀ կանոնադրությունը, որը կարգելի անդամ երկրներին միմյանց նկատմամբ տնտեսական սահմանափակումներ կիրառել: «ՍԾՏՀ կանոնանդրության փոփոխության խնդիրն է դրվել, քանի որ 21 տարի առաջ է ստեղծվել կառույցը և ներկայում կան հանգամանքներ, որ պետք է հաշվի առնվեն: Հատկապես ուշադրություն է դարձվելու սահմանափակումների վերաբերյալ կետերին, որը վերաբերում է Ադրբեջանին և Թուրքիային: Նոր կանոնանդրությամբ պետք է ամրագրվի, որ ՍԾՏՀ երկրները տնտեսական հարցերում սահմանափակումների չպետք է դիմեն», - ասաց Ղազարյանը։ Նա հավելեց, որ նիստի շրջանակներում հայկական կողմն առաջարկել է ստեղծել զբոսաշրջային ալյանս, նաև քննարկվել է բիզնես-հանրության առավել ակտիվ մասնակցությունը ՍԾՏՀ նիստերի շրջանակներում:
Սեւծովյան տնտեսական համագործակցության գործարար խորհրդի վարչության 47-րդ նիստին, որն այս տարի նախագահում էր Հայաստանը, ներկա 6 երկրների ներկայացուցիչներ քննարկել են ՍԾՏՀ գործարար խորհրդի գործունեության հաշվետվությունը, գործարար խորհրդի 2013 թվականի բյուջեն, ինչպես նաեւ 2014-2015 թվականների բյուջեի կանխատեսումները։ Խորհրդի անդամ երկրները ծրագրեր են իրականացնում տրանսպորտի, առեւտրի, տուրիզմի, շինարարության ոլորտում:
Աղբյուրը՝ armenpress.am
Անուն* | |
Ձեր էլ. հասցեն* | |
Ուղարկվող էլ. հասցեն* | |
Մեկնաբանություններ
մեկնաբանություններ չկան
Մեկնաբանել
Մեկնաբանություններ կարող են թողնել միայն գրանցված օգտվողները:Անհրաժեշտ է մուտք գործել կամ գրանցվել