ՀԱԳՄ խորհրդի նիստ

Սեպտեմբերի 9–ին կայացավ ՀԱԳՄ խորհրդի նիստ, որի օրակարգային առաջին հարցը ներկայացրեց ՀԱԳՄ նախագահ Արսեն Ղազարյանը։ Դրական կարծիք չստացած' պարտադիր ֆինանսական աուդիտ անցած ՀԱԳՄ անդամ կազմակերպությունների հետագա խնդիրների մասին թեմայի վերաբերյալ ծավալված ակտիվ քննարկման ընթացքում գործարարների մտահոգություններին ու հարցադրումներին պատասխանեց ՀՀ ֆինանսների փոխնախարար Լիաննա Հունանյանը։

ՀՀ վարչապետի մոտ 2013թ. հունիսի 8–ին կայացած հանդիպման արդյունքները ներկայացրեց ՀԱԳՄ գործադիր տնօրեն Էդուարդ Կիրակոսյանը։

Շիրակի մարզպետի և Գյումրի քաղաքի իշխանությունների հետ հանդիպման արդյունքների և դրա հետ կապված հետագա քայլերի խնդրին անդրադառնալով՝ Միության նախագահը նշեց, որ այն պետք է լինի շարունակական և առավել գործնական։ Պարոն Ղազարյանը, որպես անհրաժեշտ գործոն, կարևորեց պրակտիկ վարչարարության ընթացքում գործարարությանը խոչընդոտող հարցերի հավաքագրումը։

Միության գործադիր տնօրենը խորհրդի անդամներին ներկայացրեց Արդյունաբերողների և գործարարների միջազգային կոնգրեսի 10–րդ հաշվետու–ընտրական համագումարին մասնակցելու և Լեռնային Ղարաբաղի Հանրապետության կողմից 2013թ. դեկտեմբերի 28–ին անցկացվելիք համահայկական վիճակախաղին աջակցելու վերաբերյալ հարցերը, որոնք արժանացան խորհրդի անդամների հավանությանը։