Հայ – իտալական տնտեսական կապեր

Մայիսի 24–ին Հայաստանի արդյունաբերողների և գործարարների միություն այցելեց իտալացի գործարարների մի պատվիրակություն, որին մասնավորապես հետաքրքրում էր Հայաստանի արտաքին տնտեսական կապերը, արտադրանքի մրցունակությունը և արտահանման պոտենցիալը։ Միության գործադիր տնօրեն Էդուարդ Կիրակոսյանը հյուրերին ներկայացրեց Հայաստանի հատկապես ոչմետաղական բնական անսպառ պաշարները, դրանց համատեղ մշակման գործում համագործակցության հնարավորությունը և փոխշահավետությունը։ Նա միաժամանկ հիշեցրեց, որ դեռևս խորհրդային տարիներին Հայաստանից Իտալիա էր արտահանվում աշխարհի ամենամաքուր պեռլիտը, որի մշակմամբ հանրապետությունն այսօր հսկայական շահույթներ կունենա՝ էականորեն ավելացնելով արտահանման ծավալները։ Պայմանավորվածություն ձեռք բերվեց հաջորդ հանդիպմանը մտադրություններն առավել առարկայական դարձնել և կոնկրետ ծրագրեր քննարկել։