ՀԱԳՄ նախագահ Արսեն Ղազարյան

Հայաստանի արդյունաբերողների և գործարարների Միությունը (ՀԱԳՄ) ստեղծվել է 1996 թվականին:
ՀԱԳՄ-ն շահույթ չհետապնդող հասարակական կազմակերպություն է, որը շահերի ընդհանրության հիման վրա միավորում է արդյունաբերության, առևտրի, ֆինանսական համակարգի, գյուղատնտեսութան, տրանսպորտի, շինարարության և տնտեսության այլ ոլորտներում գործարարությամբ զբաղվող անձանց:
ՀԱԳՄ-ի գործունեության համար հատկանշական են երկրում տնտեսական բարեփոխումների իրականացմանան գործում անկողմնակալությունն ու հետևողականությունը, ակտիվ մասնակցությունը տնտեսական օրենսդրության կատարելագործմանը, սատարումը հայրենական արտադրողի շահերի ներկայացմանը և պաշտպանությանը, միջազգային գործարար համագործակցության զարգացմանը, առանձին ընկերությունների միջև փոխշահավետ կապերի հաստատմանը:
Միությունն իր գործունեությունն իրականացնում է ինքնակառավարման, թափանցելիության, ժողովրդավարության, ինչպես նաև իր անդամների կամավորության և հավասարազորության սկզբունքներով:
ՀԱԳՄ-ն կառուցողական համագործակցության մեջ է ՀՀ Նախագահի աշխատակազմի, Կառավարության, նախարարությունների և Ազգային Ժողովի հետ:
ՀԱԳՄ-ն ձևավորել է կառուցողական ընդդիմախոսի կարգավիճակ տնտեսական քաղաքականությանը կամ օրենսդրությանը վերաբերող քննարկումների հայեցակարգային փաստաթղթերին առնչվող հարցերում:
Իր ծրագրային դրույթների իրականացման համատեքստում ՀԱԳՄ-ն ակտիվորեն համագործակցում է նաև Հայաստանի Հանրապետության մի շարք պետական և հասարակական կազմակերպությունների հետ:
ՀԱԳՄ նախագահին իրավունք է վերապահված մասնակցելու ՀՀ կառավարության նիստերին: Նա հանդիսանում է ՀՀ վարչապետի նախագահությամբ գործող Գործարարության աջակցման խորհրդի, մի շարք նախարարությունների և գերատեսչությունների կոլեգիալ խորհուրդների անդամ: ՀԱԳՄ-ն ակտիվորեն մասնակցում է նաև Հայաստանի և արտասահմանյան մի շարք երկրների հետ ստեղծված միջկառավարական առևտրատնտեսական հանձնաժողովների աշխատանքներին: